رائعة الثائر عبد الرحمن يوسف... يوم الشهيد

كان يا ما كان

كان فى شهيد فاكرينه مات

واقف بيتفرج علينا من سكات

يدخل علينا زى نور المشربية

ويزيد له شوقنا مع حديث الذكريات

يمسح دموع الأمهات

حمال أسية

والصبر غية

صوت المظاهرة يلهمه

طالع لجنة ربنا على سلمه

والكام رصاصة الدفيانين جواه معادش بتألمه

أيوه

معادش بتألمه

إلا اما واحد صاحبه يبكى عليه ويتشحتف بكلمة زى

الله يرحمه

خلفتى يا مصر

واللى خلف شهيد ما مات

سبعتلاف عام مواكب خير بتتوالى

خلفتى فرحة وفرحة غيرنا لسه ما جات

خلفتى كلمة لأمة لسه قوالة

خلفتى راجل بيهزم جيش من الأغوات

نعلى بأفعالنا ونفوسنا ما تتعالى

بننحسب بالغلط فى لستة الأموات

واحنا اللى ما عشنا فوق ضهر الوجود عالة

*****

كان يا ما كان

كان فيه شهيد

كانت نهايته أو بدايته لما يوم حفروا القنال

خلف شهيد

كانت حكايته لما يوم عبروا القنال

خلف شهيد

عاش كالرجال

حربه اسمها اللقمة الحلال

كان فى شهيد

عايش سؤال

مين اللى ماسك دفة المركب

وحادف ليه شمال؟؟؟

مين اللى خرم مركبك يا مصر؟؟؟؟

مين اللى داس الكوخ برجل القصر؟؟؟

****

كان ياما كان

كان فى شهيد رافع علامة النصر

يوم كان فى عبّارة

ويوم فى القطر

وليلة بايت فى الدويقة فى بيت من صخر

وليلة جوه القسم أو فى المعتقل راضى وسعيد

خالد سعيد

عاش كالرجال

سيد بلال

***

كان ياما كان

كان فى شهيد

خلف شهيد

جاور شهيد

كان جد جده كمان شهيد

صاحب شهيد

ناسب شهيد

جوز بناته الخمسة لاولاد الجيران

طلعم ولاد عم الشهيد

جابم شهيد

عاشم وما عاشم

يقاوموا القتل فى الطوابير

ماشيين على المسامير

والكل بيعظم سلام لعصابة الخنازير

والظلم فاض

هات طوبة ياض

داخلين علينا البطلجية طوال عراض

راكبين جمال شبه القراض

هات طوبة ياض

حصلنى دوغرى عند عبمنعم رياض

بتقولى عبمعنم رياض؟؟؟؟؟؟

مش قلت لك

كان فى شهيد

خلف شهيد

خلف شهيد؟؟؟

طب إيه الجديد؟؟؟

ربك يريد

***

إنت الشهيد اللى جبينك ضى

واخد تلات رصاصات على شومة ما قلت الأى

زينة ولاد الحى

وانتى الشهيدة عروسة مالهاش زى

إنت الشهيد

وقصيدتى ماشية فى موكبك بتزك

إنت اليقين فى أمة عاشت عمرها بتشك

ماشى فى طريقك محترم

والكل ماشى يعك

نزلتنا بأسلوبك انت لزحمة الميدان من زحمة الفيس بوك

إنت الشهيد ابن الشهيد اللى اتولد علشان يكون ابنه شهيد

وابنه شهيد

وابنه شهيد

طب إيه الجديد؟؟؟

ربك يريد

***

وحياة كنايس رددت صوت الأدان

وحياة شجاعة شعب

ضد رئيس جبان

وحياة ما دمعنا وكحينا وخنقتنا بقنابل من دخان

وحياة سلاح الأمريكان ضد الشغب

وحياة ما شاف الكون على إيدينا العجب

وحياة ما قُداسنا وصلاتنا وحدوا كل المكان

وجمدوا جرى الزمان

وحياة ما زيناك يا سور البرلمان

وحياة جرايد هلست واتريقت

وحياة أمانى اتجمعت واتفرقت

وحياة فدادين الغلابة اللى على أهل القصور اتبعزقت

وحياة إرادة اتجرأت

وحياة عينين اتخزقت

وحياة عينين تانية فى وشوشنا برقت

الثورة دى مش ملكنا

إحنا اللى ملك الثورة يا جدعان

وحياة نومتنا عالرصيف وسط الميدان

دم الشهيد ابن الشهيد اللى أكيد خلف شهيد

لازم ينور درب مستقبل جديد

منصورة بينا يا مصر منصورة

رسمنا ثورتنا بلون العدل

وعملنا م الدبابة سبورة

نكتب عليها رأينا فى الندل

ونجيب ولادنا لاجل ياخدوا جنبها صورة

ماشيين بقدرة ربنا عالحبل

ما يهمناش السجن ولا القتل

نايمين على الأسفلت شوكة فى حلق أى عصابة محشورة

منصورة بينا يا مصر

منصــــــــــــــورة

بصرااااااااحة احساس روووووووووووووووعة

إنتى اللى روعة

منصورة بينا يا مصر

منصورة

» منتديات الشاعر عبد الرحمن يوسف
» قصيدة دم الشهيد
» مصر تحتفل بيوم الشهيد