هديه لحبيبتك فى العيد

مساء الخير :
بما ان احنا عايشين فى ايام عيد وايام مفترجه دى ولازم كل واحد يجيب هديه لحبيبته ويعيد عليها.
بس انا حبيبتى عارفه انى مش هقولها كل سنه وانتى طيبه وعارفه انى مش هاروح اجيب ليها هديه ودباديب فى يوم ورغم كل ده هى موافقه وراضيه
لانها عارفه اد ايه انا بحبها وهى بتحبنى فعلا .
حبيبتى مبتكدبش ومبتخنش ومش بتفكر فى غيرى وهى معايا
حبيبتى مش بتكلم كتير عشان مش تجيبلى صداع بالعكس هى اللى بتودى الصداع
حبيبتى بيضه ورفيعه ورجليها حمراء ومش تقيله عليا ولا على قلبى
حبيبتى معايا 24 ساعه حبيبتى معايا اول ما اصحى من النوم
حبيبتى معايا قبل ما انام .
مهما كان مودى حلو او وحش معايا عمرها ما تسبنى وانا مضايق
تفضل معايا وتولع فى نفسه عشان تسعدنى
ولما اكون سعيد تكون معايا عشان تسعدنى اكتر
هى بصراحه مش بس معايا هى جامبى وجوايا وريحتها ملزمانى
حبيبتى مش بتفارق شفايفى
الدكتور قالى ابعد عنها شويه بس مقدرتش واول ما طلعت من عند الدكتور
بوستها جامد اوى
حبيبتى مش بكسف منها لو احنا لوحدنا او معانا حد
حبيبتى مش هتسيبنى غير وانا على باب القبر ولو حكمت هوصى انها تدفن معايا .
حبيبتى وانا بعيد عنها ببقا متنرفز
حبيبتى امى وناس كتير اوى مش بيحبوها
لكن سايبينى معاها عشان عارفين انى بحبها
لما حد يقولى ربنا يكرمك وتبعد عنها اقوله مش هيحصل
يقولى والله هضرك اقوله خلينى اضر مره واحده من حاجه بحبها

اتمنى انك تكونى عرفتى اد ايه انا بحبك يا سجارتى