تعالى اعرفك انتى لية واخدة بالقفا

بسم الله
انا ان شاء الله هعرفك فى الموضوع دة انتى لية واخدة بالقفا من زوجك
لية زوجك مش بيغير عليكى ولا بيهتم بيكى؟ وبيعاملك معاملة الفلوس المضروبة هتلف تلف وترجع تانى
لية مش بيديكى مصروف خاص بيكى ولا بيجيب لك حااجات خاصة بيكى؟
انا هكشف الستار عن كل الاسئلة دى

السبب انتى ايوة يا مزة
انتى اللى عملتية كدة
والموضوع دة هيفيد المتزوجين حديثا اكتر بكتير فى نقطة معينة وهيفيد برضة اى واحدة متزوجة

نيجى لاول نقطة هوة لية مش بيغير
معظم الستات المصرية بتستخسر فى نفسها الحاجة
وتقول بدل ما اجيب حاجة لنفسى اجيب كيلو تفاح للعيال
مش هوة دة اللى بيحصل؟
جاوبنى بصراحة
دى اللى مخلى زوجك مديكى الصابونة التمام
ومش كفاية تهتمى بنفسك فى البيت بس
لازم تكونى شيك فى كل حاجة فى كل وقت حتى وانتى نازلة تجيبى عيش
ومش معنى كدة تكونى متبرجة
اللى بتلبس عبايات تهتم بنضافة وشياكة عبايتها مش تقعد بالخمس سنين لابسة نفس العباية وهيا خارجة مع جوزها
جوزها بيبقى حاسس وهو ماشى جمبها ان متجوز الشاويش عطية وميتغرش عليها اصلا
واحيانا بيحس بينة وبين نفسة انها متشرفهوش عشان كدة مبيحبش يخرج معاكى أصلا بس مش بيقول

واللى بتلبس بناطيل وتونيكات برضة لبسها لازم يكون منسق وشيك ومتكونش مبهدلة فى نفسها كدة

وعموما جوزك لازم يشوفك على طول متجددة وشيك اوى اوى هيغير عليكى جدا وهيحس دايما انك خطيبتة مش مراتة

هحكيلكم مثال للتوضيح
انا ليا اخت اتجوزت انا وهيا فى نفس الشهر ومر على جوازنا 5 سنين
واحنا الاتنين واخدين ازواجنا عن حب
وهيا اجمل منى مليييييييييييييييييون مرة اقسم بالله امورة ماشاء الله
تمام
هيا بقى بعد الزواج بقت تخرج باى حاجة تونك مبهدل على بنطلون قديم وبتستخسر تجيب لنفسها اى حاجة ودايما تقول العيال اولى
جوزها بقى مديها الصابونة التمام ومبقاش يحب يخرج معاها اصلا وهيا تشتكى وتقول مبقاش يحب ولا يغير مع انى بعمل واسوى فى اوضة النوم

انا بقى الحمد لله طول عمرى مهتمية بنفسى ومازلت
بعمل توازن بين طلبات العيال وطلباتى الشخصية
مش معنى كدة انى مدية العيال صابونة
بس عاملة توازن لا كلة ليهم ولا كلة ليا
المهم كنت خارجة امبارح مع حوحو وكنت لابسة طقم جديد شيك جدا ومحترم بس شيك اوى
وبتعمد كل ما اخرج معاة اكون لابسة حاجة جديدة
اصلنا مش بنخرج كل يوم يعنى
يعنى لو خرجنا مرة كل شهرين يبقى رضا
المهم حسيت ان جوزى خايف عليا اوى واحنا ماشيين ومهتم بيا جدا وعايز ياكل الناس اللى ماشية
حسيت انى خطيبتة مش مراتة
وروحنا لماما
قولتلة انا هنزل اشترى حاجة من البوتيك اللى تحت بيت ماما
مرضييييييييييش ابدا يسبنى انزل لوحدى (خوف وغيره) وصمم ينزل معايا للبوتيك اللى تحت البيت عشان اشترى مبرد ضوافر ههههههههههههه وخدنى ومشانى وجابلى كوكتيل كمان هههههههههههه وكانت فرصة العيال فوق مع امى
يبقى لازم الست تكون ست كل وقت وكل مكان حتى وهيا بتدعك الحمام هتحس ان جوزها بيلف حوالين نفسة من الحب والغيرة

نيجى بقى للنقطة التانية
والنقطة دى هتفيد المتزوجين حديثا اكتر زى ما قولت
لية زوجك مش بيديكى مصروف شخصى وبيجيب ليكى اى حاجة خاصة بيكى بالضالين مع انة معاة وبيحبك؟
انتى الل عملتى كدة
عارفة عشان هبلة او وربنا هبلة
هفهمكم اكتر لما تسمعوا الموقف دة
اختى لمات اتجوزت من كتر حبها لجوزها (فاهمة الحب غلط) مكنتش بتطلب اى شئ لنفسها خالص او كانت بتتكسف وساعات كانت مبتحبش ترهقة ماديا
والنتيجة لما بقت تطلب بقى سعادتة يحس انة بيجبى عليا لانة اصلا معودتهوش على كدة وحس ان الطبيعى انة ميكونش ليها طلبات شخصية
واترتب على كدة انها بقت مبهدلة فى نفسها
واترتب على كدة انة مبقاش يغيير عليها وحلقلها
ورجعنا لنقطة الصفر

انا بقى
من اول يوم جواز
فهمتة انى كيان ليا طلبات خاصة
والطلبات دى ضروريات زى الاكل والشرب
بنى ادمة بتحتاج لبس ومكياج وعطور ومنظفات شخصية للبشرة والجسم وكوافير وكريمات وشحن موبيل وجزم وشنط
طبعا مش بطلب كل دة مرة واحدة
ولا بفترى علية
ولا بحملة فوق طاقتة
كلة بالحب والعقل وبعدم الافترى
بس انا عودتة ان دة الطبيعى انى بنى ادمة ليا طلبات
فبقى طبيعى يكون ليا مصروف شهرى
ادلع بية نفسى مرة اشترى طقم مرة جزمة وشنطة مرة اكسسورى وعطور مرة قمصان نوم مرة مكياج كدة يعنى
واترتب على كدة انى على طول بقيت شيك
واترتب على كدة انة بقى يحبنى اوى اكتر وبقى يغير عليا اكتر
فالمفروض بقى اى عروسة من اول يوم زواج تعود جوزها انها ليها طلبات
مش بطة اشتراها عشان يربيها فى البيت تاكل وبس

احكيلكم 3 مواقف طراف حصلوا معنا امبارح بقى هيخليكم تحسوا انى كلامى صح مليون المية
انا طبعا بهتم ببشرتى وجسمى ولبسى وكد زى ما وضحت

اول موقف حصل امبارح
واحنا ماشين فى الشارع محمود قابل واحد معرفتة بيقولة ميين المزة اللى معاك دى مش خايف حد يشوفك ويقول لمراتك ههههههههههههههههههه
انا انشكحت اوى اوى وحسيت منة انة انبسط انة مراتة كتيرة علية وبصلى بصة فيها مزيج من الحب والغيرة

تانى موقف حصل امبارح
دخلنا محل نشترى حاجة الراجل صاحب المحل بيقولى خدى رأى باباكى ههههههههههههه
افتكرة بابايا هههههههههههههههههههههه
هوة اكبر منى ب 10 سنين صحيح بس انا عندى 26 سنة وهة 36 مش لدرجة بابا يعنى وكمان انا كلبوظة حبة مش سفروتة يعنى
على فكرة الاهتمام بالنفس بيصغر السن
جوزى ساعتها زعل على نفسة وانشكح بيا اوى
والراجل انصدم لما عرف انة وجوزى وعندنا عيلين هههههههههههههههه

تالت موقف حصل امبارح
واحنا ماشيين قابلت واحدة كانت معايا فى ثانوى وبقالى سنين طويلة معرفش عنها حاجة
افتكرتنا مخطوبين او كاتين مع بعض هههههههههههههههههه
لان دايما الصورة للمتجوزين يبقوا ماشيين فى نكد والولية ضاربة بوز ومبدلة فى نفسها
وجوزى لما شاف صاحبتى جارة وراها العيال ازاى وشكلها عامل ايه ومفعكشة ازى وضاربة البوز التمام
حسيت منة انة حمد ربنا عليا
واحتفلا بكدة جابلى سنودتش شاورما

ولما انا بعمل فى نفسى كل دة وجوزى بيحس كل الاحاسيس دى مبيستخسرش فيا اى حاجة

الموضوع حلقة مفرغة وكل حاجة مترتبة على التانية بس انتوا تلعبوها صح

» لكى انتى محبوبتى
» تعلم اللغة الانجليزية و انتى فى البيت
» شاعر عجز عن مدح الله تعالى !!