أنا ما بخافش

أنا ما بخافش وحافضل أقول

كلمة حق عليها مسئول

إن الريس راجل طيب

وبشعبه دايماً مشغول

مشغول إنه يلم فلوسنا

بره سويسرا يحوشهالنا

وفى حسابات سرية يشيلها

نفسه يأمن مستقبلنا



شفتوا ازاى بقى قلبه رحيم؟؟

عنده إيمان وضميره سليم

بيجوعكوا لاجل تخسوا

آه يا شعب محتاج لرجيم



من جهلكو بتقولوا بطالة

وإن الأحوال موش شغالة

والراجل نفسه يريحكم

هى الراحة تبقى عوالة؟؟؟



أما حكاية المنتجعات

ليه تسموها معتقلات؟؟؟

ليه الظن وسوء النية

نفسه يفسحكوا يا بهوات



أما الكرسى واللى اتقال

ده كلام مش محتاج لسؤال

الغلطة دى غلطتنا يا عالم

إن ما جبناش كرسى تيفال



والله تعبتوا معاكو الراجل

ضيع عمره ومين يستاهل

حتى الأكل بياكله بدالنا

طالع واكل

نازل واكل