انا للبيع اللى هيشترينى يدخل ويدفع فى المزاد

مزاد
انا علاء وعارض نفسى للبيع حد يشترينى المبلغ المطلوب مش كتير 20 الف جنيه
ده الاساسى طبعا فى مزاد بس للاسف محدش متقدم فى المزاد .
امبارح باليل كنت بكلم واحد صاحبى وبقول ليه احنا ممكن نعمل حجات غريبه ونغير حياتنا عشان اشخاص بنحبهم بس انا ممكن حد يعمل عشانى كده او يغير حياته .
قالى : ازاى
قولت ليه انا ممكن ابيع نفسى عشان اى حد عزيز عندى .
الكلمه فضلت فى دماغى ومش عايزه تسيب دماغى هو فعلا الواحد ممكن يبيع نفسه عشان شخص بيعزه .
وصحيت وانا بفكر انى خلاص ناوى ابيع نفسى .
بس انا لقيت طريقتين للبيع ممكن ابيع نفسى قطاعى وممكن جمله
القطاعى : انى افك نفسى كليتين وقلب وفشه وقرانيتين ( قرنيه العين ) وللاسف مش عندى شعر ابيعه يعنى هعمل مبلغ 800 الف جنيه بس على فكره انا كده مش كسبان عارفين ليه ؟
لانى هتباع فى كل مكان وممكن واحد فاسق ياخد عينى يبص على حاجه كده ولا كده وانا عينى تدخل معاه النار وممكن واحد صالح يشترى عينى التانيه ويقرأ بيها قرأن ويدخل ويدخل عينى معاه الجنه وبقا عين فى الجنه وعين فى النار .
الجمله : مكسب اقل بس اهو احسن انا اللى هقبض محدش غيرى هيقبض ليا وبعدين انا نافع مش وحش الا حد ما ذكى , والى حد ما بعرف اكتب , وبعرف اسوق عربيه يعنى ممكن يشغلنى سواق ليه , وعندى شويه لغات اهو تنفع ,واطبخ كمان , واعرف اعمل حجات كتير , وممكن يشغلنى يستفاد بمجهودى , وممكن لو معملتش معاه ربح حلو يبعنى تانى .
بس انا ليا شروط فى الانسان اللى هيشترينى او الانسانه اللى هتشترينى .
لازم يبقا شخص رايق يكون ميبقاش مستعجل على الدنيا يبقا شخص عايز يعيش , ولازم باردو يكون مثقف عشان مش بحب الاغبيه , وميكونش ليه فى السياسه او الكوره لانى انا زهقت من الكوره والسياسه . ويكون بيحب المازيكا اهو عشان الحياه تبقا حلوه ومريحه ويكون عندى مزاج اى مزاج , وميكونش واخد الدنيا تحدى .
انا متوقع هعمل مبلغ كويس انا عايز المبلغ ده عشان اشترى انسان او انسانه عزيزه عليا كانت باردو معروضه للبيع .
بس قبل ما اشتريها كان نفسى اسالها سؤال .
كان ممكن تبيع نفسها عشان تشترينى او تتعب زى ما انا تعبت عشان اشتريها اكيد لا عشان كده هطلب منكم طلب واحد كل واحد بيعز شخص يسال نفسه سؤال .
السؤال هو : ياترى ممكن تعمل ايه عشان شخص وياترى الشخص ده ممكن يعمل ايه عشانك سؤال حلو وسهل اوى ممكن نساله لنفسنا عن اشخاص فى حياتنا .
مش هتصدقوه لو قولت ليكم انى بحضر فى اى موضوع يومين او ثلاثه واول مره اعمل موضوع عن رد فعلى داخلى بعد موضوع حصلى بخمس دقايق تقريبا . وهو يا ادامن الموضوع حلو مفهوش اى كلمه قبيحه .
بس انا فى الاخر لو حبيت اشتم اى حد فى الموضوع ده زى ما بحب اشتم كالعاده فى كل مواضيعى هشتم شخص واحد اسمه علاء لانه فعلا يستاهل

اوك مفيش مشكله وانا هستنى ردك