ليلة حنة بأقل التكاليف ادخلى وشوفى

[size=21][b]ليلة حنة بأقل التكاليف.. ادخلى وشوفى

الحقوني بسرعة قبل ما أفركش الجوازة دي...

الفلوس خلاص خلصت في تكاليف العفش والاستعداد للفرح والذي منه ومش عارفة أجيب فلوس منين علشان مصاريف ليلة الحنة...

لا بابا عايز يدفع فلوس ولا العريس هو كمان عايز يدفع.. كل واحد فيهم بيقول لي: "أنا خلاص شطبت"..

طيب أنا أعمل إيه؟ يعني أكون أقل من صاحبتي اللي جابت الست السودانية وعملت لها ليلة الحنة بتاعتها؟

وبعدين من زمان قوي وأنا باتمنى إن ليلة حنتي تكون ليلة تحكي وتتحاكى بيها الناس كلها..

(ده كلام اى بنت الفلوس قصرت معاها وخلاص مش مفيش حل)

بس انا جايبلكم الحل

الموضوع سهل وبسيط جدا ومش محتاج الست السودانية.. كل الحكاية محتاجة إنك تعرفي شوية الحاجات البسيطة دي اللي هنقول لك عليها واللي لو عرفتيها يبقى إن شاء الله هتعملي ليلة حنة يحكي ويتحاكى بيها الناس كلهم ومش بعيد بعد كده أي عروسة عايزة تعمل ليلة الحنة تجيبك علشان تعمليها وبكده تبقي كسبتِ وظيفة مربحة جدا جدا..

تعالي نعرف الحاجات دي مع بعض..

أولا: ألوان الحنة

شوفي يا قمر.. الحنة الأصلية لونين اتنين بس، هم حنة حمراء ودي كلنا عارفينها طبعا والحنة السوداء أو اللي بتسمى "الدايج"..

وخدي بالك إنك..
• لو كنتِ هتستخدمي الحنة الحمراء
يبقى من الأحسن إنك تشتريها من عند العطار "ورق حنة" بدلا من الأكياس اللي بتكون جاهزة علشان تتأكدي إن مافيش عليها أي إضافات ممكن إنها تكون مضرة بجلدك وتسبب لك لا قدر الله حساسية.
• لو كنتِ هتستخدمي الحنة السمراء
لو هتستخدمي الحنة السمراء فلازم تعرفي إنها بتكون يا إما على شكل بودرة في كيس يا إما بتكون قطع متماسكة.. وبيتم أخذ القليل من الماء الساخن بمعلقة صغيرة والتقليب لغاية ما يتم مزج الحنة مع المياه.

ثانيا: طرق إعداد الحنة
شوفي يا ستي طرق إعداد الحنة بتختلف باختلاف الطريقة اللي هتستخدم بيها؛ يعني مثلا لو كنتِ هتحطيها على إيدك بهدف تلوين إيدك فقط فدي ليها طريقة وإذا كنت هتستخدميها للنقش فدي ليها طريقة تانية.
وهنعرف مع بعض دلوقتي الطريقتين

الطريقة الأولى
للتلوين فقط
فيه عرايس بتحب إنها تلون كف إيدها وأظفارها بالحنة فقط من غير أي نقوش والموضوع ده كان بيستخدم زمان ولسه برضه فيه بعض الناس بتستخدم الطريقة دي لارتباطها ببعض العادات والمعتقدات عندهم.
وفي الطريقة دي بتجهز الحنة عن طريق:
1- عجن مقدار من الحنة (يكفي لتغطية اليدين والقدمين) بماء دافئ + نقطتين من زيت المحلبية وده هتلاقيه عند العطار وفي محلات العطور الزيتية+ عصير الليمون).
2- تغطي العجينة وتتركيها حتى تخمر مدة لا تقل عن ساعتين وتصل في بعض الأحيان إلى 8 ساعات.
3- توضع العجينة على اليدين والرجلين ثم تترك لمدة ساعتين أو ثلاث ساعات حتى تجف تماما.
4- بعد مرور الساعتين تغسل اليدان بالماء فقط وتجفف، وخدي بالك إنك بعد ما تغسلي إيدك ماتتعرضيش للمية تاني لمدة 5 ساعات علشان اللون يثبت.

الطريقة التانية
عمل رسومات بالحنة على الجلد
فيه عرايس تانية بتحب إنها تدلع نفسها عن طريق الرسم بالحنة على أكتر من مكان في جسمها زي مثلا منطقة "الرجل والإيدين والصدر والبطن".
وعلى فكرة فيه أكتر من طريقة ممكن إنك تستخدميها علشان تنقشي على جسمك فعندك مثلا:
أولا: طريقة عود القطن أو المحقن.. حقنة بدون إبرة
1- هتجيبي الحنة وتنخليها بشاشة نظيفة أو منخل حرير وده علشان تتأكدي إن الحنة بقت ناعمة.
2- اخلطي الحنة بالماء الدافئ مع نقطتين من زيت المحلبية وخدي بالك إن العجينة تكون لينة نوعا ما.
3- سيبي الحنة لمدة ساعتين علشان تتخمر.
4- هاتي عود القطن أو حقنة بدون إبرة واملي المحقن بعجينة الحنة عن طريق ملعقة صغيرة.
5- ادهني إيدك بنقطتين من زيت المحلبية أو بنقطتين عصير ليمون.
6- حددي الشكل اللي إنت عايزة تعمليه على إيديك أو رجلك وارسمي على الجسم مباشرة وبعد الانتهاء من الرسم يمكن رش اليدين بنقط خفيفة من الماء على شكل رذاذ وده علشان الحنة ماتلزقش على الجلد.
7- سيبي الحنة على جسمك لغاية ما تنشف وبعد كده اغسلي جسمك بالمية فقط من غير دعك ولا صابون وعلى فكرة ممكن إنك تدهني الجلد بزيت الطعام ونقط الليمون لتثبيت اللون.
ثانياً: طريقة نقش الحناء بالأنبوب الجاهز
والطريقة دي سهلة نوعا ما وده لأن فيه حنة بتتباع معبأة في أنابيب صغيرة زي أنبوب معجون الأسنان والحنة بتنزل على هيئة خطوط رفيعة.
ودي بتكون جاهزة للنقش على طول وعلى فكرة الأنبوب ده له قمع رفيع يثبت في الفوهة بعد فتحها والقمع نفسه بيتم ثقبه بإبرة للسماح بمرور الحنة الجاهزة.
بس برضه لازم تاخدي بالك من شوية الحاجات دي:
1- قبل ما تستخدمي الحنة دي اغسلي إيدك ورجلك بالماء فقط.
2- لو لاقيتِ إن الحنة مش خارجة من الأنبوبة دي يبقى ياريت تنظفي فوهة القمع الطويل بإبرة.
3- ولو قربت الأنبوبة من الانتهاء فطبقيها من أسفل إلى أعلى مثل أنبوبة معجون الأسنان وده علشان تتجنبي تعب اليد من الضغط .
4- بعد ما تخلصي عمل الرسومات المناسبة سيبي إيدك علشان تنشف وبعد كده اغسلي إيدك بالمية فقط.
6- الحنة دي بتوضع في الثلاجة دائما ولا يتم تعريضها للشمس أو الضوء الشديد علشان ده ممكن يعرضها للتلف.
ثالثا: طريقة نقش الحنة باستخدام قمع بلاستيك
1- هاتي قطعة من البلاستيك القوي زي اللي بيستخدم في فرش الدولاب مقاس 18سم × 18 سم.
2- اعملي القطعة دي على شكل قرطاس واعملي فيه ثقب رفيع من تحت.
3- باستخدام ملعقة صغيرة املي القرطاس بالحنة.
4- يتم تطبيق القرطاس من أعلى، ونلصقه بطريقة تمنع تسرب أي نقطة من أعلى وده بلصق شريط "سلوتيب" أو أي لاصق آخر عليه.
5- أمسكي القرطاس مثل القلم تماما وقومي بوضع الحنة على رجلك حيث تمر الحنة من فتحة القرطاس من أسفل دون أي تدخل منك، (أي لا تقطعي رأس القرطاس) وسوف تنزل الحنة على هيئة خطوط رفيعة يمكن عمل أشكال وزخارف على حسب الرسم اللي إنت عايزاه.

حاجة أخيرة

أكيد بعد ما قريتِ الجزء اللي فات فيه كذا حاجة دارت في دماغك، وعقلك دلوقتي عمّال يودي ويجيب بأكتر من سؤال..

ولأني دايما باقرأ أفكارك من غير ما تقولي هاقول لك على الأسئلة اللي دارت في دماغك وأجاوبك كمان..

السؤال الأول
إيه هي أنواع النقوش؟؟؟
إنتِ دلوقتي هتقولي إنتم قلتم على الطريقة بس فيه حاجة مهمة؛ ليه مش اتكلمتم عليها وهي: إيه هي أنواع النقوش المستخدمة وازاي نفرق بينها؟؟؟
شوفي يا ستي.. فيه عندك أكتر من نقشة..
فيه عندك مثلا:[/size]

[size=21]
النقش السوداني وده بيكون برسومات عريضة.
النقش الخليجي وده بيكون برسومات ناعمة وبسيطة.
النقش اليمني بتكون رسوماته صغيرة ودقيقة.
النقش الهندي بيكون الرسوم فيه صغيرة جدا وكل رسمة قريبة من التانية.
النقش المجوز وده بيكون جامع بين نقشتين هما النقشة الخليجي مع السوداني...
[/size]

[size=21]خدي بالك إن العروسة بتختار النقشة السوداني اللي فيها رسومات عريضة ونقوش متداخلة لكن إخوات العروسة أو أصحابها بيختاروا النقشة البسيطة على كف الإيد فقط..

ودي شوية رسومات ممكن إنك تبصي عليها علشان تحاولي إنك تعملي زيها

اضغطي على الصورة لمشاهدة الصور
السؤال التاني
ماباعرفش أرسم؟؟
السوال التاني اللي بيدور في دماغك دلوقتي هو إنك مش بتعرفي ترسمي.. يبقى ازاي هتعرفي ترسمي وتعملي الحاجات دي لنفسك؟؟
ولا يهمك برضه لأني هاقول لك دلوقي على أكتر من حل وإنت اختاري اللي يناسبك..
لو مش بتعرفي ترسمي يبقى حاولي إنك تمرني نفسك على الصور بإنك تمشي بفرشاة ألوان أو قلم رصاص على الخطوط من على الصورة اللي إنت عايزة تعمليها على إيدك.. مرة مع مرة هتلاقي نفسك بقيتِ شاطرة، بس أهم حاجة يكون عندك ثقة في نفسك وإيدك مش تتهز.
لو مش هتقدري تعملي كده يبقى ادي المهمة دي لحد تثقي في قدراته وأكيد أي عيلة فيها حد بيعرف يرسم.

السؤال الثالث
معقول الكلام ده
آخر سؤال ممكن يكون بيدور في دماغك دلوقتي هو معقول إني بعد ما أعمل الحاجات دي كلها هالاقي نفس النتيجة اللي أنا عايزاها؟
آه طبعا.. ماتخافيش.. لو عملتِ نفس الخطوات اللي احنا قلنا عليها دي إن شاء الله هتوصلي لنفس النتيجة...

وعلشان أكون عملت كل اللي عليّ خدي بالك من شوية الحاجات دي..
1- لو كانت بشرتك سمراء يبقى هتلاقي إن الحنة السمراء هي المناسبة ليكِ جدا لأن نقوشها هتكون واضحة في إيدك... لكن لو كانت بشرتك بيضاء هتلاقي إن كل أنواع الحنة مناسبة ليكِ جدا وفي الحالتين هتكوني عروسة زي القمر في ليلة 14.
2- بلاش تحطي خل في عجينة الحنة أو أي مواد بترولية بحجة تثبيت اللون لأن كل الحاجات دي مضرة على الجلد ومش بتثبت اللون.
3- بعد ما تخلصي رسم من الأفضل إنك ماتغسليش مكان الحنة بالصابون لمدة 12 ساعة، ومن الأفضل إنك ماتحطيش أي نوع من أنواع الكريمات المرطبة مكان الحنة لأن الحاجات دي ممكن إنها تخلي لون النقش باهت.
4- عند نقش الحناء لازم إيدك تكون ثابتة على سطح مريح.

[/size]

[size=21]
باقي أهم حاجة لازم نتكلم عليها
وهي...
الاستعداد لحفلة الحنة نفسها
:
:
:

وازاي إنك بأقل التكاليف الممكنة ممكن تخلي حفلة الحنة بتاعتك حفلة يحكي ويتحاكى بيها الكل...

ياترى فكرتِ في الحاجات اللي إنت محتاجة ليها واللي ممكن إنك تعمليها علشان تعملي ليلة حنة يحكي ويتحاكى بيها الكل بأقل التكاليف الممكنة؟
ولا يهمك.. احنا فكرنالك..
وهنقول لك دلوقتي على كل اللي إنت هتحتاجيه...
أولا: تحديد عدد المدعوين
شوفي يا عروسة أول حاجة لازم تعمليها هي إنك تحددي عدد المدعوين اللي إنت ناوية تعزميهم على الحنة وخدي بالك إنك طبعا هتعملي الحنة دي في البيت علشان كده ياريت إن عدد المدعوين مايكونش كتير زيادة عن اللزوم واكتفي بأصحابك البنات والأقارب من الدرجة الأولى....

وحاولي إنك تحرصي على إن اللي تعزميهم دول يكونوا بنات علشان يعملوا ليكِ جو حلو.
ثانيا: تجهيز البيت لاستقبال المدعوين
شوفي يا قمر بما إنك قررتِ إنك تعملي الحنة في بيتك يبقي لازم تجهزي البيت لاستقبال الضيوف وتحددي المكان اللي هتكون فيه الحفلة واللي غالبا ما هيكون الريسبشن بتاع الشقة لأن ده أكبر مكان واسع في الشقة...

علشان كده ياريت إنك إنت وأصحابك قبل الحنة بيوم تشيلوا الحاجات اللي تخافي عليها من الكسر زي مثلا الفازات الغالية والتحف اللي بتبقى في المكان وشيلي الترابيزات الموجودة وحطي الكراسي بشكل دائري.

وسيبي المكان اللي في النص فاضي علشان ترقصي فيه إنت وأصحابك براحتك...
ثالثا: هاتي بالونات
إيه رأيك لما تعملي حاجة تدي ديكور شيك في المكان وماتاخدش مساحة كبيرة وهي إنك تجيبي بالونات كبيرة بأشكال متنوعة وتعلقيها..

وعلى فكرة كمان ممكن إنك تعملي في البالونات دي شوية أفكار زي إنك:
• تكتبي عليها بخط كبير بعض الكلمات اللي طالعة من قلبك وإنت عارفة طبعا إن أحسن الكلمات هي اللي بتكون طالعة من القلب.
• تكتبي اسمك واسم خطيبك ومعاهم تاريخ الحنة أو تاريخ أول يوم اتقابلتم فيه.
• الصقي عليها صورتك وصورة خطيبك وإنتم مع بعض.

رابعا: جهزي أكتر من كاميرا
وجهزي أغنيات على الكمبيوتر
استحالة طبعا المناسبة السعيدة دي تمر من غير ما يكون فيه حاجة تسجلها لحظة بلحظة علشان كده جهزي أكتر من كاميرا..

واستعيني باتنين من أصحابك بتكوني بتثقي في إنهم بيصوروا كويس واطلبي منهم إن كل واحدة تصور كل لقطة في الحفلة، بحيث مفيش لقطة أو منظر يعدي من غير تصوير...

وخدي بالك إنك تتأكدي بنفسك من إن البطارية مشحونة كويس وإن كل حاجة تمام.. ياريت يكون فيه أكتر من كاميراتين علشان الطوارئ...

كمان جهزي أغنيات على الكمبيوتر زي الأغنيات الخاصة بليلة الحنة وأغاني الأفراح أو أي أغاني إنت بتحبي تسمعيها واعملي لستة بيهم وحطيهم في فولدر مع بعض كلهم وسمي الفولدر ده باسم "حنة" علشان أي ظروف تلاقيهم تاني مش تقعدي تدوري من جديد..

واتأكدي إن السماعات صوتها حلو ومافيش فيها أي مشاكل...
خامسا: جهزي الحاجة الساقعة أو الشيكولاتة والذي منه..
أكيد طبعا في اليوم ده لازم تقدمي للناس اللي جاية واجب الضيافة.. بس برضه من غير ما تكلفي نفسك كتير، يعني من الآخر كده على حسب الفلوس اللي معاكِ هاتي الحاجات اللي إنت هتقدميها فممكن إنك تقدمي شوكولاتة بس أو تقدمي جاتوه وحلويات أو إنك تعملي ساندويتشات بسيطة زي مثلا ساندويتشات فراخ بانيه أو كفتة وجبنة رومي...
أو ممكن إنك تكتفي فقط بعصائر أو أي مشروبات ساقعة يعني من الآخر كده خليكِ بسيطة واللي في مقدورك اعمليه لأن الناس في الوقت ده جاية تفرح مش جاية تاكل.
وعلى فكرة لو مش فاضية تجهزي الحاجات دي ممكن توكلي المهمة دي لمامتك أو أختك الكبيرة أو واحدة من أصحابك أو أي حد يحب يخدم وياريت تكون الحاجات دي جاهزة وموجودة على السفرة بشكل منظم قبل الناس ما تيجي.

سادسا: جهزي نفسك إنتِ بقى
بعد ما اطمنتِ على كل حاجة بنفسك ادخلي أوضتك كده ومعاكِ واحدة بتثقي في ذوقها وجهزي الحاجات اللي إنت هتجيبيها يوم الحنة..

أول حاجة
أول حاجة تجهزيها هي لبسك وطبعا أكيد هتسألي نفسك وتقولي ياترى ألبس إيه.. أنا مش عارفة ومحتارة.

شوفي يا ستي أكيد إنت جبتِ في لبسك الجديد عبايات جديدة علشان كده عايزاكِ تعملي حسابك وتخلي واحدة منها في بيت والدك علشان تلبسيها في ليلة الحنة...

وياريت العباية اللي إنت هتختاريها دي يكون لونها فاتح ويكون فيها شغل وحركات كده علشان تتدلعي براحتك.. ده يومك.

ولو كنتِ مش بتحبي العبايات أو إن الحنة دي هيكون فيها مثلا ناس أغراب وعايزة تظهري قدامهم بمظهر شيك يبقى مافيش مشكلة من إنك تلبسي تونيك شيك، بس خدي بالك إن التونيك ده يكون برضه فيه شغل وتطريز.... وعادي جدا برضه إنك تلبسي فستان قماش، وممكن تعملي حسابك قبلها بفترة وتجيبي فستان سواريه علشان اليوم ده....

ودي مجموعة من العبايات المطرزة
ممكن تختاري منها

وعلى فكرة فيه ناس مش بتتقيد بلبس معين للحنة خاصة إذا كان اللي هيكون في الحنة بنات بس من سن بعض زي أصحابها أو قرايبها البنات فبتلاقي إن في الوقت ده بيلبسوا أي حاجة بينهم وبين بعض.
بس يا ستي.. دي كانت شوية اقتراحات تساعدك على اختيار لبسك في يوم الحنة.. تعالي نشوف هتجهزي إيه تاني...
تاني حاجة
تاني حاجة تجهزيها هي مكياجك بإنك تختاري الألوان المناسبة وماشية على لون لبسك ولون بشرتك، وخدي بالك إنك ماتكتريش علشان بشرتك ماترهقش من المكياج وإنت صابحة تعملي مكياج الفرح...
تالت حاجة
تالت حاجة جهزي الإكسسورات اللي إنت هتلبسيها وخدي بالك إن ألوانها تكون ماشية مع لبسك وإوعي تنسي إنك تحطي خرزة زرقاء في الإكسسوارات دي علشان الحسد..
سابعا: جهزي البخور
طبعا اللي هتشوف الكلمة دي هتضحك قوي بس أنا باتكلم جد.. آه جهزي البخور لأن البخور ده مهم جدا في ليلة الحنة علشان يبعد عنك عيون الحساد ويخلّي البيت ريحته حلوة...

ودي أنواع من البخور اللي بتكون قوية وريحتها بتدوم فترة طويلة.. ممكن إنك تجيبيه من عند العطار:
- العود.
- الجاوي.
- السعد.
- الصندل.
- الكافور.
بس كده خلاص.. خلص كلامنا عن الحاجات اللي ممكن إنك تعمليها علشان تعملي ليلة حنة يحكي ويتحاكى بيها الكل.

وإوعي تنسي إنك تجهزي الحاجات اللي ينفع تجهزيها قبلها بفترة كبيرة علشان أعصابك تبقى مستريحة..
وخدي بالك كمان إنك لازم في اليوم ده تخلي أعصابك هادية وبلاش توتر وتكوني نايمة كويس قبلها
وارقصي إنت وأصحابك وأهلك وافرحي براحتك من غير أي تكاليف زيادة إنت أولى بيها خاصة مع بداية الزواج..

وألف مبروك.. وزفاف سعيد.. إن شاء الله
وعقبال كل البنات

[/size][/b]

ملف هام جدا
ونصائح مميزة للغاية وعملية
دام عبق الانتقاء
ودومت بخير

» أفكـار مذهلة لتجديد منزلكـ بأقل كلفة بالصور
» ليلة الدخلة اعترافات
» متخوفة من ليلة الزفاف